Ekainak 18rako Venezuela Aurrera PLATAFORMAK BILBON deitutako manifestazioaren aurrean

Ekainak 18rako Venezuela Aurrera PLATAFORMAK BILBON deitutako manifestazioaren aurrean

Ezkerraldea Antifaxista antolakundeak, Venezuelako herriak pairatzen duen egoeraz konsziente delarik, bat egin nahi du Venezuela Aurrera plataformak ekainaren 18an Bilbon antolatutako deialdiarekin eta langile eta herri antifaxista guztiari bertaratzeko deia luzatzen dio.

Oligarkia inperialistaren hedabideek deitzen duten “oposizio demokratiko” horrek, Ukrainan edo Sirian egiten duten bezala, Venezuelako Errepublika Bolibartarraren gobernu legitimoaren aurka ari da egoera gaiztotzen, klase herrikoienentzako bideratzen diren zerbitzu publikoen aurkako eraso terroristak burutzen, demokratikoak eta aurrerazaleak diren ekimenak zapuzten, eta neurriz kanpoko bortizkeria bultzatuz, herritarren artean hildakoak eragiten.

Venezuelako prozesu bolibartarra aurrera eramateko moduarekin eta zehazkiago, bere gobernuak hura gidatzeko eta “sozialismoan sakontzeko” hartutako ildoaren gainean ditugun ezadostasunen eta iritzi aniztasunaren gainetik, une honetan Venezuelako Gobernua irmo eta zalantzagabe defendatu beharrean gaudela adierazi nahi dugu. Une konkretu honetan Venezuelan jokoan dagoena ez delako bide zuzenenaren gaineko eztabaida. Jokoan dagoena  herri oso baten duintasuna da, mendeetan zehar Venezuelan baztertuta bizi izan diren klaseek prozesu bolibartarrarekin lortutako boteretzea, ongizate sozialari eta sistema publikoari dagokionez lortutako aurrerapenak, politikoki emandako aldaketa aurrerazale-demokratikoak, etab. Une honetan, Maduro eta Gobernu bolibartarra defendatzea, munduan gauzak nola dauden ikusita, Chileko Allende defendatzea bezain argia iruditzen zaigu, zalantzagabeko betebehar antifaxista alegia.

Guretzat, prozesu bolibartarrak likidatu eta desantolatu ez dituen Venezuelako klase aberats eta atzerakoienek gidatzen, diruz laguntzen eta antolatzen dute delako oposizio hau, bere adierazpen bortitzena barne. Horretarako inperialismoaren babesa daukate, Venezuela Bolibartarrak egiten duen bere lurraldearen eta ekonomiaren subirautzaren defentsa arazo larri bat delako oligarkia eta euren klaseko pribilegioak arriskuan somatzen dituzten beste sektore batzuentzako. Espainiar estatua aberatsen esanetara dagoen oposizio honen aldekoa da eta Euskal Herrian ere, besteak beste, PNV alderdiko Iñaki Anasagastik, euskal eskuinaren ordezkari bikainak alegia, babestu egin ditu eta Bilbon burutu dituzten mobilizazioetan lehen lerroan kokatu da.

Argiago esanda, guretzat, altxamendu herrikoi eta demokratikoa deitzen duten hori, aldagai partikularren gainetik, Ukraina edo Sirian gertatu bezala, altxamendu FAXISTA eta erreakzionarioa besterik ez dela adierazi nahi dugu. Altxamendu faxista honen aldekoek Bilbon bertan lau mobilizazio burutu dituzte azken hiru hilabeteotan, lasai asko eta inolako herri-erantzunik gabe. Hori dela eta ALERTA ANTIFAXISTA zabaldu nahi dugu, egin ditzaketen hurrengo agerpenetan Euskal Herrian lekurik ez dutela ozen eta irmo jakin dezaten eta honi dagokionez ere, euskal langileok batasun antifaxistaren bidetik antolatzen has gaitezen. 
           

SIRIAN ETA UKRAINAN BEZALA, VENEZUELAN ERE FAXISMOARI BITARTEKO GUZTIEKIN AURRE EGIN

EUSKAL ANTIFAXISTOK VENEZUELA ERREPUBLIKA BOLIBARTARRA DEFENDA DEZAGUN